Chi mi cunti!

Oggi ni appiccicanu u codici a barri
a tutti, 'nda frunti, e non si pò luvari!
cu tutta a data di scadenza
e chidda di pruvinienza!
Comu i buatti do pummarroru,
comu a carni pò broru!
Ma unni semu iunti!
e tu ca mi rici: cchi mi cunti!
Iu ti cuntu ca semu pinocchi,
pezzi di lignu senza occhi,
figghi di nuddu manipulati,
di genti tinti e malasuttati!
A scola ci sù sulu scecchi e mura,
nenti bagni, stufi, seggi e culura!
U travagghiu addivintau lussu
di quattru alliccaperi senza mussu.
E tu mi rici : chi ti cuntu!
Voi riri ca sulu iu mi sentu accussì cunsuntu?
A festa di Sant' Aita tanta genti,
appressu a lu carru cu l'argenti,
ma non si fa buddellu ppi nostri diritti,
tri iatti protestunu ppa via, stritti stritti,
nuddu i caca mancu li santi,
chista è na società di babbi e di furfanti.
Oggi iettunu i bummi a chiddi ca rumpunu i testi
dumani sarà u momentu pì cchiddi sulu onesti!
Ma unni semu iunti!
e tu ca mi rici: chi mi cunti!
Semu a un puntu ca non ritonna,
semu a fimmata ad aspittari cu non tonna!
giramu tunni tunni comu pazzi,
e u cielu è chinu di nuvoli a chiazzi,
ci rici ca nenti di bbonu arresta.
pi non peddiri ci vulissuru autri gesta,
si pò cangiari u munnu stringennu i renti,
assicutari lattri, assassini e putenti!
tutti assemi potemu spusteri muntagni,
no! non vogghiu cchiù stari ai sò caccagni!

Basta pocu

Cetti voti basta pocu
pi cangiari na iurnata.
Cetti paroli boni
dannu cunfortu
e curanu ferite.
Sù comu a pioggia
n'da terra sicca,
su comu u ventu
ca pulizzia u cielu.
Cetti voti basta pocu
p'appizzari na iurnata.
Cetti taliaturi
ammuccianu odiu e ingannu
e fannu mali.
Sù comu u mari
ca arrimina fotti l'acqua
ma non astuta u focu
di lu nostru pettu.
Cetti voti basta pocu
pi cascari o pi susirisi.

Mutu

Non mi piaci sintilli cetti paroli,
e scappu,
e m'ammucciu.
E tu ca mi spii: cè permesso?
e iu c'arrispunnu: No!
picchì non mi piaci sintilli cetti paroli,
avvoti picchì va tuttu beni,
autri voti picchì va tuttu mali.
Sì, scappu e m'ammucciu allura.
E' mutu,
u' sgrusciu.

Non ciarrinesciu

Tuttu ciò ca viru o penzu,

iu non ciarrinesciu

a scrivilli o a dilli,

arrestunu chiusi fitti i pinzeri e l'immaggini,

comu gomituli intricciati,

unni non viri mai,

unni è l'iniziu e unni è a fini.

Tuttu ciò ca viru o penzu,

iu non ciarrinesciu

a sentiri o tuccari,

sulu oria muta,

avvoti liggera,

autri voti pisantuna

comu chidda da fabbrica.

Non viru, non penzu,

non sentu, non toccu.

Tuttu è nenti

e nenti sugnu iu,

vulissi fimmari stu respiru affannusu,

fimmari stu tempu ca sa tuttu,

e iu no,

non ciarrinesciu.

Empire

Ma u sacciu iu...

iu ca mi perdu macari 'ndo bar

e non trovu mai u cessu.

Ma u sacciu iu...

ca vi taliu abballari ni sta oll

tutta dorata e luccicanti

che vostri facci attruccati

c'arririti e taliati

a chi cu comu a mia si movi

femmu nell'angolo nicu do munnu.

Ma u sacciu iu...

ca vulissi avvulari

supra i vostri testi

e girari e furriari

e dirivi ora cantannu:

abballati abballati

genti schetta e maritata

abballati ora

comu a mmia.

Vogghiu dommìri

Arrusbigghiati ca u tempu pi dommiri finiu!!!

susiti, lavati e spalumma! 

Squagghiunu accussì l'anni, in pochi girati di culu!

Arrusbigghiati ca u tempu pi dommiri finiu!!

ma poi ricu chi c'è di fari ni stu munnu spannenti

a levanti e a punenti sulu putenti 

c' arrirunu e ballanu in faccia alla genti! 

Senti arrusbigghiami sulu quannu,

cunnannanu tutti sti delinquenti

e si non ci sarà mai giustizia 

lassami girari u culu e dommiri

picchì è 'ndo letto ca viru u munnu

che trizzi e che cannola.

Quannu nesciu da fabbrica

Quannu nesciu da fabbrica,

mi spunta un sorrisu,

accussì, sulu,

e a facci pari chiù liscia,

u cielu chiù blu,

u suli chiù cauru.

Quannu nesciu da fabbrica,

pi n'attimu pari ca tutto si femma,

u tempu macari.

E' un mumentu nicu,

poi sacciu sulu ca finisci subitu st'arricriata,

mentri a machina patti, gira e furria ancora.

Quannu nesciu da fabbrica,

pensu ai cosi caia ffari,

ca parunu tanti e tutti belli,

ma quannu ordinu i pinzeri,

no sacciu cchiù quali sù,

scumparunu a tipu spiddi,

e a vogghia di ciccalli

si nni và  macari chidda.

Quannu nesciu da fabbrica,

pensu ca dumani ritornanu,

sti sorrisi,sti pinzeri,

e dumani e ancora dumani,

e sacciu ca durano

 quannu na tirata di sigaretta.

Vulissi esseri fumu

e durari un muccuni.